

सुनसरीको भाेक्राहा नरसिंह गाउँपालिकामा आयोजना गरिएको अध्यक्ष कप अन्तर विद्यालय खेलकुद प्रतियोगिता आज सफलता पूर्वक सम्पन्न भएको छ। खेलकुद समितिका अध्यक्ष तथा शिक्षा तथा खेलकुद विकास शाखाका प्रमुख रमेशचन्द्र तिम्सिनाको अध्यक्षता र गाउँपालिका अध्यक्ष अजमल अख्तर आजादको प्रमुख आतिथ्यमा सुरु भएको प्रतियोगिता आज दुई दिनसम्म सञ्चालन भएकाे हाे।
प्रतियोगितामा माध्यमिक र आधारभूत तहका विद्यार्थीहरूबीच भलिबल, कबड्डी, स्लो साइकल रेस, हाईजम्प, लङजम्प, म्युजिक चेयर, चम्चा दौड, र विभिन्न दौड प्रतियोगिताहरू समावेश गरिएका थिए।
कबड्डी खेलमा जनता माध्यमिक विद्यालय, वडा नम्बर ७ नरसिंहले उत्कृष्ट प्रदर्शन गर्दै उपाधि हात पारेको छ । भने भलिबल खेलमा जामिया इस्लामीया, वडा नम्बर २ ले विजयी बनेको छ।गाउँपालिका अध्यक्ष अजमल अख्तर आजादले विजेता टोलीहरूलाई ट्रफी, मेडल, र प्रमाणपत्र प्रदान गर्दै खेलाडीहरूको प्रशंसा गरेका छन्। उनले खेलकुदले विद्यार्थीहरूको शारीरिक, मानसिक, र सामाजिक विकासमा महत्त्वपूर्ण योगदान पुर्याउने बताएका छन्। साथै, अध्यक्ष आजादले शारदा माध्यमिक विद्यालयको खेल मैदानमा घेराबन्दी गर्न वडाध्यक्ष लक्ष्मण मेहतालाई जग्गा छुट्याउन ध्यानाकर्षण गराउँदै गाउँपालिकाले खेलकुदको लागि आवश्यक सहयोग गर्ने प्रतिवद्धता व्यक्त गरेका हुन् ।
समारोहमा गाउँपालिकाकी उपाध्यक्ष सुनिता कुमारी उराँव, वडा नम्बर १ का वडाध्यक्ष लक्ष्मण मेहता, वडा नम्बर ३ का वडाध्यक्ष धिरेन्द्र यादव, वडा नम्बर ४ का वडाध्यक्ष हारूण अंसारी, वडा नम्बर ६ का वडाध्यक्ष सेराजुद्विन अंसारी, वडा नम्बर ८ का वडाध्यक्ष उस्मान अंसारी (भोला हाजी), र नेपाल रेडक्रस सोसाइटी भाेक्राहा नरसिंह उपशाखाका सभापति युवराज दाहाल लगायतका विशिष्ट अतिथिहरूको उपस्थिति रहेको थियो।
त्यसैगरी खेलकुद समितिका अध्यक्ष रमेशचन्द्र तिम्सिनाले खेलकुदले अनुशासन, सहकार्य, र स्वस्थ जीवनशैलीको विकासमा सहयोग पुर्याउने बताए। आयोजकका अनुसार, प्रतियोगिताले भाेक्राहा नरसिंह क्षेत्रका विद्यार्थीहरूको प्रतिभा उजागर गर्न र नयाँ खेलाडीहरूको पहिचानमा सहयोग गर्ने उद्देश्य राखेको छ।
कार्यक्रममा स्थानीय विद्यालयका शिक्षक, विद्यार्थी, र खेलप्रेमीहरूको उल्लेखनीय उपस्थिति रहेको थियो।