सुनसरी । नेपाली काङग्रेसका नेता डाक्टर शेखर कोइरालाले वर्तमान सरकारलाई असफल हुने छुट नभएको बताउनुभएको छ ।
सुनसरीको धरान उपमहानगरपालिकामा मङगलबार नेपाल पत्रकार महासंघ सुनसरीका नवनिर्वाचित प्रतिनिधिको आयोजित पदस्थापन कार्यक्रमलाई सम्बोधन गर्नुहुदै उहाँले सो कुरा बताउनुभयो ।
राजनीतिक स्थायित्वका लागि काङग्रेस र एमाले ठूला दल मिलेर सरकार बनाएकाले गर्दा जनतामा रहेको निराशालाई चिर्दै आशा ल्याउने काम गर्नुपर्नेमा जोड दिनुभयो । वर्तमान सरकारलाई असफल हुने छुट नभएको उहाँले उल्लेख गर्नुभयो । केपी शर्मा ओली नेतृत्वको सरकार असफल भएमा अराजकता निम्तिने उहाँले उल्लेख गर्नुभयो ।
वर्तमान सरकारले छिटो भन्दा छिटो काम गरेर देखाउनुपर्ने अवस्था रहेको नेता डाक्टर कोइरालाले बताउनुभयो । अहिलेको सरकारलाई सुशासन र विकासलाई प्राथमिकतामा राखेर काम गर्नका लागि उहाँले सुझाब दिनुभयो । स्थिरता नभएकाले जनतामा निराश बढ्दै गएको बताउनुहुदै यसतर्फ गम्भीर हुनुपर्नेमा जोड दिनुभयो ।
अहिले दुई ठूला दल मिलेर सरकार सञ्चालन गरेको भएपनि आगामी २०८४ को निर्वाचनमा एमालेसँगै मुख्य प्रतिस्पर्धा हुने बताउनुभयो । वर्तमान सरकारमा नेपाली काङग्रेसबाट गएका मन्त्रीले सहकार्य गर्ने बताउनुहुदै अन्य नेता प्रतिस्पर्धा गरेर अघि बढ्ने उल्लेख गर्नुभयो ।
लोकतन्त्रको पहरेदार सञ्चार माध्यमले आशा जगाउने किसिमका समाचारलाई पनि प्राथमिकता दिनुपर्नेमा सुझाब दिनुभयो । कार्यक्रममा नेपाली काङग्रेसका केन्द्रिय सदस्य राजिव कोइरालाले पत्रकारहरु प्रेस तथा अभिव्यक्ति स्वतन्त्रताका पक्षमा एक ठाउँमा उभिएर काम गर्नुपर्ने बताउनुभयो ।
नेकपा एमालेका केन्द्रीय सदस्य मञ्जु भण्डारीले गलत अफवाह फैलाएर चर्चित हुने व्यक्तिप्रति सचेत हुनुपर्नेमा जोड दिनुभयो । यही मङसिर २८ गते भएको नेपाल पत्रकार महासङ्घको निर्वाचन अन्तर्गत सुनसरीमा अध्यक्षमा विजयी सन्तोष काफ्ले सहितको कार्यसमिति, प्रदेश परिषद् सदस्य र संघीय परिषद् सदस्यलाई पदस्थापन गरिएको थियो ।